اسلام آباد (نیوز ڈیسک)پاکستان تحریک انصاف کے رہنما بابر اعوان نے کہا کہ 23دسمبر کو اسمبلیاں توڑیں گے، جس سے 27 کلو میٹر کی حکومت گر جائے گی، پی ڈی ایم نے معیشت، ایوان اور قانون سمیت تمام معاملات کا بیڑا غرق کر دیا ہے۔پیر کو اسلام آباد میں جوڈیشل کمپلیکس کے باہر میڈیا سے گفتگو کرتے ہوئے بابر اعوان نے کہا کہ آج 2 مقدمات پر جوڈیشل کمپلیکس آئے، دونوں جھوٹے مقدمات تھے، ایک مقدمہ اعظم سواتی اور دوسرا عمران خان کے خلاف ہے۔انہوں نے کہا کہ عمران خان کی ضمانت قبل از گرفتاری میں 10 جنوری تک توسیع ہو گئی ہے، سیلاب زدہ افراد کی امداد کے بجائے جہاز سیاسی شخصیات کے لیے اڑائے جا رہے ہیں۔بابر اعوان کا کہنا ہے کہ پراسیکیوٹر کہتے ہیں کہ بحث کرنی ہے اور بعد میں جج کے ٹرانسفر آرڈر آ جاتے ہیں۔انہوں نے مزید کہا کہ حکومت کو ڈر تھا کہ عمران خان اسلام آباد آیا تو ہمیں گھر جانا پڑے گا، یہ کہتے تھے کہ 6 ماہ میں پاکستان کو اٹھا دیں گے،مولانا فضل الرحمٰن کے جلسوں میں امدادی ٹینٹ اور کارپٹ استعمال ہو رہے ہیں، پی ڈی ایم نے معیشت، ایوان اور قانون سمیت تمام معاملات کا بیڑا غرق کر دیا ہے۔
